4 وصفات صحية للأطفال والبيبهات
كل أم بتحس بالذنب لما أولادها مش بياكلوا كويس أو مش بياكلوا كتير! بتناضل عشان كل معلقة بتتقدم للطفل يكون فيها كل العناصر الغذائية المطلوبة، غير المجهود الفظيع في محاولات إن الطفل يتقبل الأكل الجديد.
وإحنا النهارده عايزين نكون جزء ولو بسيط من الحل بوصفات سريعة، مغذية، سهلة وكمان لذيذة.
*قبل ما تجربي أي وصفة اتأكدي إن الطفل مش بيعاني من أي حساسية تجاه أي مكون، وإن مسموح لهم بتناول الأكلات دي حسب تعليمات الدكتور.
بان كيك البطاطا
المكونات
1 بطاطا كبيرة مستوية
2 بيضة كبيرة
رشة قرفة
طريقة الطبخ
قشّري البطاطا كويس واهرسيها بالشوكة. اخلطي البيض والقرفة.
امسحي الطاسة بزيت خفيف وسخنيها كويس على النار، ثم ابدئي في صب خليط البان كيك بكبشة صغيرة (الكمية دي هتعمل من 3 لـ 5 وحدات حسب الكمية في المرة الواحدة)
اختياري: ممكن تقدميها مع زبادي أو فواكه مقطعة.
شوفان مُسبق التحضير
المكونات:
كوب من الزبادي اليوناني
4 ملاعق كبيرة شوفان
2 معلقة صغيرة من الكريز
اختياري: عسل
طريقة الطبخ:
اخلطي جميع المكونات، ثم قسمي الكمية على 2 برطمان من الزجاج ثم ضعيهما في الثلاجة لمدة لا تقل عن ساعتين.
الزبادي المُثلج
المكونات
كوب من الزبادي اليوناني
معلقة صغيرة عسل
نصف كوب من التوت أو الفاكهة المتوفرة.
طريقة الطهي:
اخلطي الزبادي مع العسل وافرديهم على صينية.
أضيفي خليط التوت أو الفواكة.
قومي بوضع الصينية في الفريزر طوال الليل أو على الأقل لمدة 6 ساعات.
التوست الفرنسي
المكونات:
توست
بيضة
¼ كوب لبن
رشة قرفة
طريقة الطهي:
قطعي التوست بالطول لـ 3 أو 4 قطع. قومي بخلط البيض واللبن والقرفة.
اغمسي التوست في خليط اللبن لدقيقة أو اثنين. امسحي الطاسة بزيت خفيف وسخنيها جيداً ثم ضعي التوست على كل ناحية من 2 - 3 دقائق.
اختياري: قدميها مع الفواكة أو الزبادي.
=
اترك تعليق